සුවද විලවූන් නියාමනයට අවශ්‍ය නීති සැකසීම පාරිභෝගිකයා ලැබූ ජයග්‍රහණයක් – පාරිභෝගික අයිතීන් සුරැකීමේ ජාතික ව්‍යාපාරය
මෙරට භාවිතා කරන සුවද විලවූන් නියාමනය කිරීමට කිසිදු ආයතනයක් නොමැති තත්ත්වයක් තුළ ප්‍රමිතියෙන් තොර සුවද විලවුන් භාවිතා කිරීම නිසා පාරිභෝගිකයන් දැඩි පීඩාවකට පත්වූ අතර ඒ සදහා අවශ්‍ය නීති සැකසීම පාරිභෝගිකයා ලැබූ ජයග්‍රහණයක් බව පාරිභෝගික අයිතීන් සුරැකීමේ ජාතික ව්‍යාපාරය අවධාරණය කර සිටියි.පාරිභෝගික අයිතීන් සුරැකීමේ ජාතික ව්‍යාපාරයේ සභාපති රංජිත් විතානගේ මහතාගේ අත්සනින් යුතුව නිකුත් කර ඇති නිවේදනයක මේ බව සදහන් වන අතර එම නිවේදනය තුළින් වැඩිදුරටත් අනාවරණය කර ඇත්තේ පාරිභෝගික අධිකාරිය විසින් සුවද විලවූන් නියාමනය කිරීම සදහා වන නීති සකසා පාරිභෝගික අධිකාරියේ සභාපති වරයා විසින් අදාළ ගැසට් පත්‍රයට අද දින අත්සන් තබා ඇති බවයි. මේ සම්බන්ධයෙන් පාරිභෝගික අධිකාරියට ප්‍රණාමය පුදකරන බවත් අදාළ නීතිය අකුරටම ක්‍රියාත්මක කරන ලෙස ඉල්ලා සිටින බව ද මෙම නිවේදනයෙහි තවදුරටත් සදහන් කර ඇත.
