20 ගෙන ආ නිසා ජනතා විමුක්ති පෙරමුණට පැසසුම්, පුරවැසි බලය සංවිධානය…
20 වන ආණ්ඩුක්‍රම ව්‍යාවස්ථා සංශෝධන යෝජනාව පාර්ලීමේන්තුවට ඉදිරිපත් කිරීම සම්බන්ධයෙන් සිවිල් සංවිධානයක් වශයෙන් පුරවැසි බලය සංවිධානය ජනතා විමුක්ති පෙරමුණට සතුට පළ කරන බව එම සංවිධානයේ සම කැදවුම්කරු ගාමිණි වියන්ගොඩ මහතා අවධාරණය කරයි. පුරවැසි බලය සංවිධානය විසින් අද (30) දින මාධ්‍ය හමුවක් කැදවමින් මේ පිළිබදව අදහස් දැක්වූ අතර ඒ සදහා එම සංවිධානයේ සාමාජික චන්ද්‍රගුප්ත තේනුවර, වික්‍රමභාහු කරුණාරත්න, සරත් විජේසූරිය, කේ.ඩබ්.ජනරංජන, සුනිල් පෙරේරා යන අය සහභාගී විය. බලයට පැමිණෙන සෑම පුද්ගලයකුම විධායක ජනාධිපති ක්‍රමය අහෝසි කරන බව පවසා සිටියද බලයට පැමිණි පසු එම පොරොන්දු අමතක කර දමන බව ඒ මහතා වැඩිදුරටත් අදහස් දක්වන ලදි . අපවත්වී වදාළ පුජ්‍ය සෝභිත හිමියන්ගේ අරමුණ අනුගමනය කර බලයට පැමිණි වත්මන් ජනාධිපති මෛත්‍රිපාල සිරිසේන මහතාද එම පොරොන්දුව ලබා දුන් අතර මේ දක්වා විධායක ජනාධිපති ක්‍රමය අහෝසි කිරීමට කටයුතු නොකිරීම පිළිබදිව ජනාධිපතිවරයා ලැජ්ජා විය යුතු බව එම සංවිධානය අවධාරණය කරයි. ඉදිරිපත් කර ඇති 20 ආණ්ඩුක්‍රම ව්‍යාවස්ථා සංශෝධනය පාර්ලීමේන්තුවේදී සම්මත කර ගැනීම සදහා සියලූම මන්ත්‍රිවරුන්ගේ සහය ලබා දෙන ලෙස එම සංවිධානය විසින් මෙහිදී ඉල්ලීමක්ද කර ඇත.
