ඇවන්ගාඩ් නඩුව, අභියාචනාධිකරණයෙන් අත්හිටුවීමේ නියෝගයක්..
පසුගිය රජය සමයේ ගාලු වරායේ ඇවන්ගාඩ් මැරිටයිම් සමාගමට පාවෙන අවි ගබඩාවක් පවත්වාගෙන යාමට අනුමැතියදී රජයට පාඩුවක් සිදු කළැයි චෝදනා කරමින් අල්ලස් කොමිසම විසින් හිටපු ආරක්ෂක ලේකම් ගෝඨාභය රාජපක්ෂ මහතා ඇතුළු 08 දෙනෙකුට එරෙහිව පවරන ලද නඩුව විභාග කිරීම අත්හිටුවමින් අභියාචනාධිකරණය තහනම් නියෝගයක් නිකුත් කර ඇති බව වාර්තා වේ. අදාළ නඩුව කොළඹ මහේස්ත්රාත් අධිකරණය හමුවේ ගොනුකර ඇති අතර ඊට එරෙහිව හිටපු ආරක්ෂක ලේකම් ගෝඨාභය රාජපක්ෂ මහතා ඉදිරිපත් කරන ලද ප්රතිශෝධන පෙත්සම විභාගයට ගැනීමට අවසර දෙමින් අභියාචනාධිකරණ විනිසුරු මඩුල්ලක් විසින් ඉහත අත්හිටුවීමේ නියෝගය ලබාදී තිබේ. අදාළ නඩුව ගොනුකර තිබෙන ආකාරය අල්ලස් පනතට පටහැනි බැවින් මෙම ඉල්ලීම සිදුකර ඇති බව ගෝඨාභය රාජපක්ෂ මහතා වෙනුවෙන් පෙනී සිටින නීතිඥවරුන් අධිකරණයට කරුණු දක්වා ඇත.