වෙළද ගිවිසුම් වංචාවන් විමර්ශනය කිරීම සදහා “වෙළද වංචා කොමිසම” පිහිටුවන්න, වෘත්තිකයින්ගේ ජාතික පෙරමුණෙන් ජනපතිට ඉල්ලීමක්..
සමස්ත රටටම අහිතකාරි ලෙස බලපාන සිංගප්පූරු නිදහස් වෙළද ගිවිසුම සම්බන්ධයෙන් පාර්ලිමේන්තුව කල්තැබීමේ මිනිත්තු කිහිපයක විවාදයකට පමණක් සීමාකිරීම පිළිබද දැඩි කණගාටුවට පත්වන බව වෘත්තිකයින්ගේ ජාතික පෙරමුණ අවධාරණය කර සිටියි. වෘත්තිකයින්ගේ ජාතික පෙරමුණේ ලේකම්, ඉංජිනේරු කපිල පෙරේරා මහතාගේ අත්සනින් යුතුව නිකුත් කර ඇති නිවේදනයක මේ බව සදහන් කර ඇත.
මෙම නිවේදනය තුළින් වැඩිදුරටත් අනාවරණය කර ඇත්තේ රටට අගතියක් වන සිංගප්පූරු නිදහස් වෙළද ගිවිසුම අත්සන් කර කාලයක් ගතවීමෙන් පසුව ඒ සම්බන්ධයෙන් පාර්ලිමේන්තුවේ ඊයේ (18) විවාදයක් පැවති බවයි. වෙළද ගිවිසුම් වල පාරදෘශ්යභාවයක් තිබුනේ නම් මෙම විවාදය පැවැත්විය යුත්තේ මෙම ගිවිසුම අත්සන් කිරීමට පෙර බවද මෙම නිවේදනයෙහි වැඩිදුරටත් සදහන් කර ඇත.
බැදුම්කර වංචා කොමිසම පත්කළ ආකාරයටම වෙළද ගිවිසුම් වංචාවන් විමර්ශනය කිරීම සදහා “වෙළද වංචා කොමිසම” පිහිටුවීමට මෙන්ම “වෙළද ප්රතිපත්ති සම්පාදන” අධිකාරිය පිහිටුවීමේ ගැසට් නිවේදනය නිකුත් කිරීමට කටයුතු කරන ලෙස ජනාධිපතිවරයාගෙන් කාරුණිකව ඉල්ලා සිටින බවද වෘත්තිකයින්ගේ ජාතික පෙරමුණ මෙම නිවේදනයෙහි වැඩිදුරටත් සදහන් කර ඇත.