සිංගප්පූරු ගිවිසුම ගැන විමර්ශනයට කමිටුවක් පත්කිරීම, සමස්ත ජනතාවගේම ජයග්රහණයක් – තොරතුරු තාක්ෂණ වෘත්තීයවේදීන්ගේ සංගමය
සිංගප්පූරු වෙළද ගිවිසුම බලාත්මක කිරීම වළකාලමින් එම ගිවිසුම පිළිබද නිසි විමර්ශනයක් සිදුකිරීම සදහා ජනාධිපතිවරයා විසින් කමිටුවක් පත්කිරීම, සමස්ත ජනතාවම මෙන්ම මෙම ගිවිසුමට එරෙහිව කටයුතු කළ සියල්ලන්ගේම ජයග්රහණයක් බව තොරතුරු තාක්ෂණ වෘත්තීයවේදීන්ගේ සංගමය අවධාරණය කර සිටියි.ඊයේ (14) කොළඹදී පැවති මාධ්ය හමුවකදී මෙම අදහස් පළකරන ලද්දේ තොරතුරු තාක්ෂණ වෘත්තීයවේදීන්ගේ සංගමයේ ලේකම් ලසන්ත වික්රමසිංහ මහතා විසිනි.
සිය අදහස් දක්වමින් වික්රමසිංහ මහතා තවදුරටත් පවසා සිටියේ එක් පාර්ශවයකට පමණක් වාසිදායක වන අයුරින් අත්සන් කරන ලද ලොව පළමු ගිවිසුම ලෙස මෙම සිංගප්පූරු ගිවිසුම හැදින්විය හැකි බවයි. රටට අහිතකර මෙවැනි ගිවිසුමක් සකස් කළ අමාත්ය මලික් සමරවික්රම මහතා ඇතුළු පිරිසට එරෙහිව නීතිය නිසි ලෙස ක්රියාත්මකවනු ඇතැයි බලාපොරොත්තු වන බවද ලසන්ත වික්රමසිංහ මහතා තවදුරටත් සිය අදහස් දක්වමින් පවසා සිටින ලදී.
මෙම මාධ්ය හමුව සදහා සහභාගිවූ තොරතුරු තාක්ෂණ වෘත්තීයවේදීන්ගේ සංගමයේ සභාපති කපිල පෙරේරා මහතා පවසා සිටියේ නීත්යානුකූල නොවන, රටට අහිතකර මෙම සිංගප්පූරු ගිවිසුම වහාම අවලංගු කළයුතුව ඇති බවයි.