මාතර සිට බෙලිඅත්ත දක්වා නව දුම්රිය මාර්ගයේ ප්‍රථම වතාවට දුම්රියක් ධාවනය කිරීම අද..
මාතර සිට බෙලිඅත්ත දක්වා වන දුම්රිය මාර්ගයේ අද (06) නිරීක්‍ෂණ දුම්රියක් ධාවනය කිරීමට නියමිතව ඇති බව දුම්රිය දෙපාර්තමේන්තුව අනාවරණය කර සිටියි. මාතර සිට බෙලිඅත්ත දක්වා වන මෙම නව දුම්රිය මාර්ගයේ අද දුම්රියක් ධාවනය වන්නේ ප්‍රථම වරටයි. ප‍්‍රවාහන හා සිවිල් ගුවන්සේවා අමාත්‍ය අර්ජුන රණතුංග මහතා ද මෙම නිරීක්‍ෂණ ධාවනයට එක්වීමට නියමිතව ඇති බව ද වාර්තා වේ. මාතර සිට බෙලිඅත්ත දක්වා ඉදිකර ඇති මෙම දුම්රිය මාර්ගය, මාතර සිට කතරගම දක්වා ඉදිකිරීමට නියමිතව ඇති දුම්රිය මාර්ගයේ පළමු අදියරයි. මෙම කොටස කිලෝ මීටර් 26 ක දුරකින් සමන්විත වේ. මෙහි දෙවන අදියර වන්නේ කිලෝමීටර් 48 ක දුරකින් යුත් බෙලිඅත්ත සිට හම්බන්තොට දක්වා වන කොටසයි. කිලෝමීටර් 39 ක දිගකින් යුත් හම්බන්තොට සිට කතරගම දක්වා වන කොටස තුන් වන අදියර ලෙස ඉදිරිකිරීමට නියමිතව ඇත.
