රජයේ ආයතනවල දූෂණ සහ වංචා විමර්ශනයට ජනාධිපති කොමිෂන් සභාවක්..
රජයේ ආයතනවල සිදුව ඇති බව පැවසෙන දූෂණ සහ වංචා සහගත ක්‍රියාවන් සම්බන්ධයෙන් විමර්ශනය කිරීම සදහා ජනාධිපති මෛත්‍රීපාල සිරිසේන මහතා විසින් ජනාධිපති පරීක්ෂණ කොමිෂන් සභාවක් පත්කර ඇති බව වාර්තා වේ. ඒ අනුව 2015 ජනවාරි මස 15 වන දින සිට 2018 දෙසැම්බර් මස 31 වැනි දින දක්වා රජයේ ආයතනවල සිදුව ඇති වංචා සහ දූෂිත ක්‍රියා සම්බන්ධයෙන් එම කොමිසම විසින් විමර්ශනය කෙරෙනු ඇත.
මෙහි සභාපතිවරයා ලෙස විශ්‍රාමික ශ්‍රේෂ්ඨාධිකරණ විනිසුරු උපාලි අබේරත්න මහතා පත්කර ඇති අතර විශ්‍රාමික මහාධිකරණ විනිසුරු සරෝජනී කුසලා වීරවර්ධන, විශ්‍රාමික විගණකාධිපති පස්දුන් කෝරළේ ආරචිචිගේ පේමතිලක, විශ්‍රාමික අමාත්‍යාංශ ලේකම් ලලිත් ආර්. ද සිල්වා, විශ්‍රාමික නියෝජ්‍ය පොලිස්පති එම්.කේ.ඩී. විජය අමරසිංහ යන මහත්ම මහත්මීන් කොමිසමෙහි සෙසු සාමාජිකයන්ය.
