තම සටන ඉස්ලාම් අන්තවාදයට එරෙහිවයි, චෝදනා ප්රතික්ෂේප කරනවා – පූජ්ය අතුරලියේ රතන හිමි
තමන් සටන් වදින්නේ ඉස්ලාම් අන්තවාදයට එරෙහිව පමණක් බවත් එය පරාජය කිරීමට එක් පෙරමුණක් ගොඩනගන බවත් පූජ්ය අතුරලියේ රතන හිමියන් අවධාරණය කර සිටියි. මාධ්ය වෙත අදහස් දක්වමින් පූජ්ය අතුරලියේ රතන හිමියන් විසින් මෙම අදහස් පළකරන ලදී. තම ක්රියාවලිය තුළින් කොටි ඩයස්පෝරාවේ අවශ්යතා ඉටුවන්නේ යැයි එක්සත් ජාතික පක්ෂ පාර්ලිමේන්තු මන්ත්රී මුජිබර් රහුමාන් මහතා විසින් සිදුකරනු ලබන චෝදනාව ප්රතික්ෂේප කරන බව ද උන්වහන්සේ වැඩිදුරටත් පවසා සිටියි. මේ වන විට රට තුළ දැවැන්ත ආන්දෝලනයකට ලක්ව සිටින කුරුණෑගල රෝහලේ ප්රසව හා නාරිවේද වෛද්ය මොහොමඩ් සාෆි මහතා සම්බන්ධයෙන් පූජ්ය අතුරලියේ රතන හිමියන් විසින් දියත්කර ඇති ක්රියා කලාපය, කොටි ඩයස්පෝරාවේ අරමුණු ඉෂ්ඨ කිරීමක් බව පාර්ලිමේන්තු මන්ත්රි මුජිබර් රහුමාන් මහතා ඊයේ (01) ප්රකාශ කර ඇත. අදාළ ප්රකාශය සම්බන්ධයෙන් මාධ්ය විසින් විමසන ලද අවස්ථාවේ පූජ්ය අතුරලියේ රතන හිමියන් විසින් ඉහත අදහස් පළකරන ලදී.