ඥානසාර හිමිට සමාව දීමට ජනාධිපතිවරයා ගත් තීරණය අධිකරණයේ ස්වාධීනත්වයට හානියක්, විකල්ප ප්‍රතිපත්ති කේන්ද්‍රයේ පෙත්සම සලකා බැලීමට දින නියම වෙයි..
බොදුබල සේනා සංවිධානයේ ලේකම් පූජ්‍ය ගලගොඩඅත්තේ ඥානසාර හිමියන්ට සමාව ලබාදීමට ජනාධිපතිවරයා ගත් තීරණයෙන් අධිකරණයේ ස්වාධීනත්වයට හානිවූ බව සදහන් විකල්ප ප්‍රතිපත්ති කේන්ද්‍රය විසින් ඉදිරිපත් කර කරන ලද මූලික අයිතිවාසිකම් පෙත්සම සලකා බැලීම ලබන සැප්තැම්බර් 10 වනදා තෙක් කල්තැබීමට අධිකරණය නියෝග කරන ලදී. අදාළ මූලික අයිතිවාසිකම් පෙත්සම සලකා බැලූ ශ්‍රේෂ්ඨාධිකරණ ත්‍රිපුද්ගල විනිසුරු මඩුල්ල විසින් මෙම නියෝගය ලබාදෙන ලදී.
අධිකරණයට අපහාස කිරීමේ චෝදනාවට වැරදිකරුව බරපතළ සිර දඬුවම් නියමවූ ගලගොඩඅත්තේ ඥානසාර හිමියන්ට සමාව ලබදී නිදහස් කිරීමට ජනාධිපතිවරයා විසින් ගන්නා ලද තීරණය තුළින් අධිකරණයේ ස්වාධීනත්වයට දැඩි අහිතකර බලපෑමක් සිදුවන බව සදහන් කරමින් විකල්ප ප්‍රතිපත්ති කේන්ද්‍රය මෙම මූලික අයිතිවාසිකම් පෙත්සම ගොනු කර ඇත.
ජනාධිපතිවරයාගේ තීරණයෙන් ආණ්ඩුක්‍රම ව්‍යවස්ථාවේ සදහන් මූලික අයිතීන් උල්ලංඝණය වී ඇතැයි තීන්දුවක් ලබාදෙන ලෙස ද මෙම පෙත්සම මගින් ශ්‍රේෂ්ඨාධිකරණයෙන් ඉල්ලීමක් කර ඇත.
