හබරණ – දඹුල්ල මාර්ගයේ රිය අනතුරකින් තිදෙනෙක් මරුට..
ඊයේ (15) රාත්‍රී 10.00 ට පමණ හබරණ – දඹුල්ල මාර්ගයේ ටිපර් රථයක් සහ වෑන් රථයක් ගැටීමෙන් සිදුව ඇති රිය අනතුරකින් කාන්තාවන් දෙදෙනෙකු ඇතුළු තිදෙනෙක් මියගොස් ඇති බව වාර්තා වේ. ඉහත මාර්ගයේ කුඩාමීගස්වැව ප්‍රදේශයේදී මෙම අනතුර සිදුව ඇති අතර ඉන් තවත් දෙදෙනෙකු බරපතල තුවාල ලබා ඇත. වෑන් රථයේ රියදුරුවරයා සහ එහි ගමන් කරමින් සිටි කාන්තාවන් දෙදෙනෙකු මියගොස් ඇති අතර මියගිය පිරිස පොළොන්නරුව, කදුරුවෙල ප්‍රදේශයේ පදිංචිකරුවන් බව අනාවරණයවී ඇත. ටිපර් රථයේ රියදුරුවරයා පොලිසිය විසින් අත්අඩංගුවට ගෙන ඇති අතර මේ සම්බන්ධයෙන් හබරණ පොලිසිය වැඩිදුර පරීක්ෂණ පවත්වනු ලබයි.
