ගෝඨාභය රාජපක්ෂට එරෙහි පුරවැසිභාවය සම්බන්ධයෙන් වන පෙත්සම සලකා බැලීම ඇරඹෙයි..
ඉදිරි ජනාධිපති ධුර අපේක්ෂක, හිටපු ආරක්ෂක ලේකම් ගෝඨාභය රාජපක්ෂ මහතා මෙරට පුරවැසියෙකු ලෙස පිළිගැනීම වැළැක්වීමේ නියෝගයක් නිකුත් කරන්නැයි ඉල්ලා ගොනුකර ඇති පෙත්සම සලකා බැලීම මේ වන විට ආරම්භ කර ඇති බව වාර්තා වේ. අභියාචනාධිකරණ සභාපති විනිසුරු යසන්ත කෝදාගොඩ, අර්ජුන ඔබේසේකර සහ මහින්ද සමයවර්ධන යන මහත්වරුන්ගෙන් සමන්විත ත්‍රිපුද්ගල විනිසුරු මඩුල්ලක් හමුවේ මෙම පෙත්සම සලකා බැලීම අද (02) උදෑසන 09.30 ට පමණ ආරම්භවී ඇත. මෙම පෙත්සම ගොනුකරන ලද්දේ මහාචාර්ය චන්ද්‍රගුප්ත තේනුවර සහ ගාමිණි වියන්ගොඩ යන මහත්වරුන් විසිනි.
විධිමත් පුරවැසි සහතිකයකින් තොරව ගෝඨාභය රාජපක්ෂ මහතා මෙරටදී විදේශ ගමන් බලපත්‍රයක් සහ ජාතික හැදුනුම්පතක් ලබාගෙන ඇති බැවින් අදාළ බලපත්‍ර අහෝසි කිරීමේ නියෝගයක් නිකුත් කරන ලෙසත් මෙම පෙත්සම් විභාගය අවසන් වන තෙක් එම බලපත්‍ර ක්‍රියාත්මක කිරීම වැළක්වමින් අතුරු නියෝගයක් නිකුත් කරන ලෙසත් මෙම පෙත්සම තුළින් ඉල්ලා ඇත.
