හිටපු අමාත්‍ය බැසිල්ට විදෙස්ගත වීමට අධිකරණයෙන් අවසර..
රජයේ මුදල් සාවද්‍ය ලෙස පරිහරණය කළ බවට චෝදනා එල්ලකරමින් ගොනුකර ඇති නඩුවට අදාළව හිටපු අමාත්‍ය බැසිල් රාජපක්ෂ මහතාට එරෙහිව පනවන ලද විදෙස් ගමන් තහනම කාලසීමාවක් වෙනුවෙන් ඉවත්කිරීමට අධිකරණය විසින් නියම කර ඇති බව වාර්තා වේ. අදාළ නඩුව විභාගයට ගත් කොළඹ මහාධිකරණය විසින් අද (28) මෙම නියෝගය ලබාදී ඇත. සෞඛ්‍යය හේතූන් මත ප්‍රතිකාර ලබාගැනීම සදහා තමන්ට විදේශගතවීමට අවසර දෙන්නැයි බැසිල් රාජපක්ෂ මහතාගේ නීතිඥයින් විසින් කරන ලද ඉල්ලීම සලකා බලමින් අධිකරණය විසින් මෙම නියෝගය ලබාදී ඇත. ඒ අනුව ලබන දෙසැම්බර් 05 වනදා සිට 2020 වසරේ මාර්තු 06 වන දා තෙක් කාලය තුළ බැසිල් රාජපක්ෂ මහතාට විදේශගතවීම සදහා එම විදේශ ගමන් තහනම ලිහිල් කර ඇත.
