දුරුතු පුර පසලොස්වක පොහෝ දිනය අද ..
බුදුන් වහන්සේගේ ප්‍රථම ලංකා ගමනය සිදුවූ දුරුතු පුර පසලොස්වක පොහෝ දිනය අදට (10) යෙදී ඇත. සුමන සමන් දෙවියන්ගේ ආරාධනාව මත බුදුන්වහන්සේ මහියංගනයට වැඩම කර යක්ෂ සහ නාග ගෝත්‍රිකයින් අතර පැවති ගැටුම සමනය කළ බව ශාසන ඉතිහාසයේ දැක්වේ. බුදුන්වහන්සේගේ කේෂ ධාතු නිදන් කොට මහියංගනය චෛත්‍ය ඉදිකර ඇත්තේ ඉන්පසු කාලයේ වන අතර බුදුන් වහන්සේ තුන් බෑ ජටිලයන් ප්‍රමුඛ දහසක් පිරිස දහම් මගට හරවා ගැනීම අද වැනි පොහො දිනක සිදුව තිබේ. බෞද්ධ ඉතිහාසයේ දැක්වෙන්නේ බිමිබිසාර රජු විසින් බුදුන් වහන්සේ ඇතුළු මහ සඟරුවනට වේළුවනාරාමය පූජා කළේද දුරුතු පොහොය දිනයක දී බවයි. උදා වූ 2020 නව වසරේ පළමු පුර පසළොස්වක පොහොය ද මෙය වේ. මෙම වැදගත් කරුණු සිහිපත් කරමින් පිංකම්වල යෙදෙමින් අද ධර්මානුකූලව හැසිරෙන ලෙසයි භික්‍ෂූන් වහන්සේ සියළු සැදැහැවතුන්ගෙන් ඉල්ලා සිටියි.
