ජපානයේ මෙරට සේවකයින්ට රක්ෂණාවරණයක්…
ජපානයේ OTIT (Organization of Technical Intern) තාක්ෂණික සේවාස්ථා පුහුණුව සඳහා පුහුණු ලාභීන් යොමු කිරීමට ශ්රි ලංකා විදේශ සේවා නියුක්ති කාර්යාංශයේ ලියාපදිංචි වී අවසරය ලබාගෙන ඇති රැකියා නියෝජිත ආයතන දැනුවත් කිරීමේ වැඩසටහනක් (22) වන දින එම ආයතනයේදී පවත්වා ඇත. මේ සදහා ජපානයේ කම්කරු අමාත්යාංශය නියෝජනය කරමින් නියෝජ්ය උපදේශක (කවුන්සලර්) යොෂු අරින්ගා මහතා සහභාගිවී ඇති අතර එහිදී දේශීය රැකියා නියෝජිතයින් විසින් අනුගමනය කළ යුතු ක්රමවේදය හා පිළිපැදිය යුතු නීති රීති පිළිබඳව කරුණු පැහැදිලි කළ අතර, එම ක්රමවේද හා නීති රෙගුලාසිවලට පටහැනිව කටයුතු කරන අයගේ ජපානයේ රැකියා සඳහා අදාළ අනුමැතිය අවලංගු කරන බවටද ප්රකාශ කර ඇත. බඳවා ගනු ලබන තාක්ෂණික සේවාස්ථ පුහුණු ලාභී ශ්රමිකයින් අදාළ රැකියාවට ගැලපෙන පුද්ගලයින් විය යුතු බව අරින්ගා මහතා ප්රකාශ කළ අතර, සේවා ස්ථානයෙන් පැන යන ශ්රමිකයින් හේතුවෙන් මෙම වැඩසටහනෙහි අඛණ්ඩ පැවැත්මට බලපෑම් සිදුවන බවද සඳහන් කරන ලදි.
ජපානයට පුහුණු ලාභීන් යොමුකරන වෙනත් රටවල් හා සැසඳීමේදී ශ්රි ලංකා පුහුණු ලාභීන් පිළිබඳව ජපන් රජය සතුටුදායක අයුරින් තෘප්තිමත් වී ඇති අතර ඒ හේතුවෙන් විශේෂිත පුහුණු ශ්රමික (Specialized Skill Worker) වැඩසටහන ශ්රි ලාංකිකයින් වෙනුවෙන් ආරම්භ කර තිබේ. ඒ අනුව පුහුණුව ලබන පළමු වසර 3 අවසන් වීමෙන් පසුව විභාගයකට යොමුකර ඉන් සමත් නම් තවත් වසර 5ක් ලෙස වසර 8ක කාලයක් ජපානයේ සේවය කිරීමට අවස්ථාව සලසා දී ඇත. ජපානයේ සෞඛ්ය, කම්කරු හා සුභසාධන අමාත්යාංශයේ මෙහෙයවීමෙන් ලොව පුරා රටවල්වල මෙම සේවාස්ථ පුහුණු වැඩසටහන ක්රියාත්මක කරනු ලබන අතර, මේ යටතේ දැනටමත් ලාංකිකයින් 500 ට අධික පිරිසක් ජපානයේ සේවාස්ථ පුහුණුව ලබමින් වෘත්තියන්හි යෙදී සිටින බව ඒ මහතා සදහන් කලේය.
සාත්තු සේවිකා, කෘෂිකාර්මික, ආහාර නිශ්පාදන, ඉදිකිරීම් හා නිශ්පාදන යන ක්ෂේත්රවල වැඩි වශයෙන් පුහුණු අවස්ථාවන් උදා වී තිබේ. ජපානයේ පුහුණුව ලබන පුහුණු ලාභීන් සඳහා සෞඛ්ය රක්ෂණයක් නොමිලේ හිමිවන අතර, විශ්රාම වැටුපකටද උරුමකම් කීමට හැකියාව ලැබේ. මෙම වැඩසටහන ජපානය හා ශ්රි ලංකාව අතර අත්සන් කළ අවබෝධතා ගිවිසුම අනුව ක්රියාත්මක වන අතර, ජපානයේ සේවාස්ථ පුහුණව සඳහා පුහුණු ලාභීන් යොමු කිරීමට රැකියා නියෝජිත ආයතන 63ක් කාර්යාංශයේ ලියාපදිංචිය ලබා සිටියි.