ඥානසාර හිමිට එරෙහි සන්ධ්‍යා එක්නැලිගොඩගේ පෙත්සමට දින තීන්දුයි..
අතුරුදන්ව සිටින මාධ්‍යවේදී ප්‍රගීත් එක්නැලිගොඩ මහතාගේ බිරිඳ වන සන්ධ්‍යා එක්නැලිගොඩ මහත්මිය විසින් බොදු බල සේනා සංවිධානයේ මහ ලේකම් පූජ්‍ය ගලගොඩඅත්තේ ඥානසාර හිමියන් හට පනවා ඇති අත්හිටවූ සිර දඬුවම අහෝසි කර එය අනිවාර්ය සිර දඬුවමක් බවට පරිවර්තනය කරමින් නියෝගයක් නිකුත් කරන්නැයි ඉල්ලා ඉදිරිපත් කර තිබෙන අභියාචනා පෙත්සම ලබන ජූනි මස 22 වනදා සලකා බලන්නැයි ශ්‍රේෂ්ඨාධිකරණය නියෝග කරන ලදී.අදාළ පෙත්සම ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් හමුවේ අද (31) කැඳවන ලද අවස්ථාවේ මෙම නියෝගය ලබාදී ඇත. හෝමාගම මහේස්ත්‍රාත් අධිකරණයේදී ගලගොඩඅත්තේ ඥානසාර හිමියන් තමන්ට බැණ තර්ජනය කිරීමේ චෝදනාවට එම අධිකරණය මඟින් ලබාදෙන ලද මාස හයක සිරදඬුවම, අත්හිටවූ සිර දඬුවමක් බවට පරිවර්තනය කිරීම නීතිවිරෝධී බැවින් අදාළ තීරණය අහෝසි කර මාස හයක සිර දඬුවම ක්‍රියාත්මක කරමින් නියෝගයක් නිකුත් කරන ලෙසත් ශ්‍රේෂ්ඨාධිකරණයෙන් ඉල්ලා සිටිමින් සන්ධ්‍යා එක්නැලිගොඩ මහත්මිය අදාළ පෙත්සම ඉදිරිපත් කර තිබේ.
