රිෂාඩ් බදියුදීන් සහ ඔහුගේ සොහොයුරාගේ මූලික අයිතිවාසිකම් පෙත්සම් සලකා බැලීමෙන් තවත් විනිසුරුවරයෙකු ඉවත් වෙයි..
තමන්ව අත්අඩංගුවට ගෙන ත්‍රස්තවාදය වැළැක්වීමේ පනත යටතේ රඳවා තබාගැනීම නීතිවිරෝධී යැයි තීන්දු කරන ලෙස ඉල්ලා හිටපු අමාත්‍ය රිෂාඩ් බදියුදීන් සහ ඔහුගේ සොහොයුරු රියාජ් බදියුදීන් යන මහත්වරුන් විසින් ඉදිරිපත් කරන ලද මූලික අයිතිවාසිකම් පෙත්සම් සලකා බලන විනිසුරු මඩුල්ලෙන් තවත් විනිසුරුවරයෙකු ඉවත් වී තිබෙන බව වාර්තා වේ. අගවිනිසුරු ජයන්ත ජයසූරිය, එස්.තුරයිරාජා සහ යසන්ත කෝදාගොඩ යන මහත්වරුන්ගෙන් සමන්විත ත්‍රිපුද්ගල විනිසුරු මඩුල්ල හමුවේ අදාළ පෙත්සම් අද දින කැඳවන ලද අවස්ථාවේ පුද්ගලික හේතුවක් නිසා මෙම පෙත්සම සලකා බැලීමෙන් තමන් ඉවත් වන බව ශ්‍රේෂ්ඨාධිකරණ විනිසුරු යසන්ත කෝදාගොඩ මහතා විවෘත අධිකරණයේ සඳහන් කරන ලදී.
ඒ අනුව පෙත්සම සලකා බැලීම ලබන 11 වනදා තෙක් කල්තබන ලදී.
මෙම පෙත්සම් සලකා බැලීම සඳහා මීට පෙර පත්කරන ලද ත්‍රිපුද්ගල විනිසුරු මඩුල්ලෙන්ව ශ්‍රේෂ්ඨාධිකරණ විනිසුරු ජනක් ද සිල්වා මහතා ද පුද්ගලික හේතුවක් මත ඉන් ඉවත් විය.
