ජාතික සේවක සංගමයේ සේවකයින් 12 දෙනෙකු, කිසිදු විශ්‍රාමික දීමනාවකින් තොරව විශ්‍රාම ගැන්වීමේ සුදානමක් ..
එක්සත් ජාතික පක්‍ෂයට අනුබද්ධ ජාතික සේවක සංගමයේ සේවයේ නියුතුව සිටි වයස අවුරුදු 70 ඉක්මවූ සේවකයින් 12 දෙනෙකු, කිසිදු විශ්‍රාමික දීමනාවක් ලබා නොදී 2020.12.31 දින සිට විශ්‍රාම ගැන්වීමේ තීරණයක් ගෙන ඇති බව වාර්තා වේ.ජාතික සේවක සංගමයේ මුදල් කාරක සභාව විසින් මෙම තීරණය ගෙන ඇති අතර රුපියල් ලක්‍ෂ 20 ක් දක්වා වු විශ්‍රාම දීමනාවක් ලබාදී ජාතික සේවක සංගමයේ සේවයේ නියුතු අවුරුදු 70 ට වැඩි සේවකයින් විශ්‍රාම ගැන්වීමට මීට පෙර තීරණය කර තිබුනද පසුව පවත්වා ඇති එම සේවක සංගමයේ නිලධාරි මණ්ඩල රැස්වීම සහ මුදල් කාරක සභා රැස්වීම් මඟින් වයස අවුරුදු 70 ට වැඩි සේවකයින් 12 දෙනෙකු කිසිදු විශ්‍රාමික දීමනාවකින් තොරව මෙලස විශ්‍රාම ගැන්වීමට තීරණය කර ඇත.
වසර ගණනාවක් ජාතික සේවක සංගමය තුළ සේවය කළ මෙම නිලධාරීන්ට මේ ආකරායෙන් කටයුතු කිරීම පිළිබඳ එම නිලධාරන් තුළ දැඩි නොසන්සුන්තාවයක් ඇති වී ඇත. කම්කරු වෘත්තීය අයිතීන් දිනාගැනීම වෙනුවෙන් වසර ගණනාවක් පුරා දැඩි කැපවීමක් සිදුකරන ලද තමන්ට සංගමය විසින් මේ ආකාරයට ප්‍රතිචාර දැක්වීම පිළිබඳ එම සේවකයින් දැඩි අප්‍රසාදය පළකරමින් සිටින අතර මෙම තීරණයට එරෙහිව ඉදිරියේදී යම් ක්‍රියාමාර්ගයකට එළඹෙන බවද එම සේවකයින් අවධාරණය කර සිටියි.
