උත්සව සමයේදී කුකුළු මස් හිඟයකින් තොරව පාරිභෝගිකයින්ට…
සිංහල හා හින්දු අලුත් අවුරුදු උත්සවයේ දී පාරිභෝගික ජනතාවට හිඟයකින් තොරව කුකුළු මස් ලබා දීමට හැකි බව ඊයේ (12) කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා සහ කුකුළු මස් නිෂ්පාදකයින් සමඟ පැවති සාකච්ඡාවකදී ප්‍රකාශ කර ඇත. ඒ අනුව උත්සව සමයේදී පාරිභෝගික ජනතාවට කුකුළු මස් කිලෝග්‍රෑමයක් රුපියල් 1150කට අලෙවි කිරීමට සහ හිඟයකින් තොරව වෙළෙඳපොළට කුකුළු මස් නිකුත් කිරීමට හැකි බව කුකුළු මස් නිෂ්පාදකයන් පැවසීය. කුකුළු මස් හා බිත්තර මිල සම්බන්ධව මහජනතාව දැඩි අවධානයකින් සිටින බවත්, ඒ නිසා අවම මිලක් යටතේ කර්මාන්තකරුවා, පාරිභෝගිකයා මෙන්ම සිල්ලර වෙළෙන්දා ද ආරක්ෂාවන අයුරින් කුකුළු මස් සැපයීම කෙරෙහි අවධානය යොමු කරන ලෙස එහිදී අමාත්‍යවරයා විසින් සඳහන් කර ඇත.
