ප්‍රදේශ කිහිපයකට නායයෑමේ අනතුරු ඇඟවීම්, තවදුරටත් තද වැසි..
මේ වන විට දිවයිනට බලපා ඇති අයහපත් කාලගුණ තත්ත්වය හමුවේ ප්‍රදේශ කිහිපයක් සදහා නායයෑමේ අනතුරු ඇඟවීම් නිකුත් කිරීමට කටයුතු යොදා ඇතැයි ආපදා කළමනාකරණ මධ්‍යස්ථානය සදහන් කර සිටියි. ඒ අනුව ඇහැළියගොඩ, අඹගමුව, බුලත්සිංහල, කිරිඇල්ල, කලවාන, වරකාපොල සහ මතුගම යන ප්‍රාදේශීය ලේකම් කොට්ඨාශ වෙත ජාතික ගොඩනැගිලි පර්යේෂණ සංවිධානය විසින් මේ වන විට නායයෑමේ අනතුරු ඇඟවීම් නිවේදන නිකුත් කර තිබේ. මේ අතර කාලගුණ විද්‍යා දෙපාර්තමේන්තුව අනාවරණය කරන්නේ බස්නාහිර, සබරගමුව, වයඹ, මධ්‍යම සහ දකුණු පළාත් වල ප්‍රදේශ රැසක් සදහා ඉදිරි පැය 24 ක කාලය තුළ තද වැසි ඇද හැළෙනු ඇති බවයි. ඌව, නැගෙනහිර සහ උතුරුමැද පළාත් වලට ද තදවැසි ඇතිවිය හැකි බව ද එම ආරංචි මාර්ග පවසා සිටියි.
