මෙහෙකාර සේවයේ යොදවා ඇති දරුවන් සොයන්න බස්නාහිර පළාතේ විශේෂ මෙහෙයුමක්..
වයස අවුරුදු 16 ට අඩු දරුවන් මෙහෙකාර සේවයේ යොදවා ඇති බස්නාහිර පළාතේ ස්ථාන සෙවීම සඳහා අද (27) සිට විශේෂ මෙහෙයුමක් දියත් කිරීමට පොලිසිය තීරණය කර තිබේ. දරුවන්ට කෘෘර ලෙස වධහිංසා කිරීම සහ නියමිත වයස සම්පූර්ණවීමට පෙර මෙහෙකාර සේවය සඳහා යොදාගැනීම මෙරට නීතිය යටතේ වරදක් බව පොලිස් මාධ්‍ය ප්‍රකාශක, ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතා අවධාරණය කර සිටියි. ඒ අනුව ඉහත පරිදි විශේෂ මෙහෙයුමක් දියත්කර එසේ කෘෘර ලෙස වධහිංසාවන්ට ලක්වන සහ නියමිත වයස සම්පූර්ණවීමට පෙර මෙහෙකාර සේවයට යොදාගෙන ඇති දරුවන් මුදාගැනීමට කටයුතු කරන බව අජිත් රෝහණ මහතා තවදුරටත් පවසයි.
