යහපාලන ආණ්ඩුවේ නිවාස ව්‍යාපෘති ගැන අසත්‍ය තොරතුරු සමාජගත නොකරන්න, විපක්ෂ නායක කාර්යාලයෙන් නිවේදනයක්..
පැවති ආණ්ඩු සමයේ දියත් කරන ලද නිවාස ව්‍යාපෘති සම්බන්ධයෙන් අසත්‍ය තොරතුරු සමාජගත නොකරන්නැයි මෙන්ම ජනතාවට පොරොන්දු වු පරිදි නිවාස පහසුකම් සැලසීමට අවශ්‍ය කටයුතු නිසිපරිදි ක්‍රියාත්මක කරන ලෙස වත්මන් ආණ්ඩුවෙන් ඉල්ලා සිටිමින් විපක්ෂ නායක කාර්යාලයේ මාධ්‍ය අංශය විසින් නිවේදනයක් නිකුත් කර ඇත. පසුගිය යහපාලන ආණ්ඩුව විසින් ජනතාවගේ නිවාස අවශ්‍යතා සපුරාලමින් නිවාස හා ඉදිකිරීම් අමාත්‍යංශය යටතේ දියත් කරන ලද නිවාස සංවර්ධන ව්‍යාපෘති පිළිබඳව කරුණු විකෘති කරමින් මෙන්ම අසත්‍ය ප්‍රකාශ සමාජගත කිරීමට ඇතැම් මාධ්‍ය ආයතන සහ ආණ්ඩුවේ දේශපාලඥයින් කටයුතු කරමින් සිටින්නේයැයි පෙනීයන බව ද මෙම නිවේදනයෙහි වැඩිදුරටත් සඳහන් කර ඇත. වත්මන් විපක්ෂ නායක සජිත් ප්‍රේමදාස මහතා පසුගිය යහපාලන ආණ්ඩුවේ නිවාස සංවර්ධන අමාත්‍ය ධූරය හොබවින් ජනතාවගේ නිවාස අවශ්‍යතා වෙනුවෙන් දැවැන්ත වැඩපිළිවෙලක් දියත් කරන ලද නමුත් ජනතා හිතැති එම වැඩපිළිවෙල පිළිබඳව අසත්‍ය මතයන් සමාජගත කර ඉදිරි මහ මැතිවරණයේදි ඒ මහතාට අවාසිදායක තත්ත්වයක් නිර්මාණය කිරීමේ අරමුණ ඇතිව වත්මන් ආණ්ඩුවේ පිරිස් මෙවැනි උත්සහයක නිරතව සිටින බව ද මෙම නිවේදනයෙහි තවදුරටත් සඳහන් කර තිබේ.
