රටේ තත්ත්වය හමුවේ ජීවත්වීමේ අරගලයක සිටින වැඩකරන ජනතාව සුරක්ෂිත කිරීම ආණ්ඩුවේ ප්රමුඛ වගකීමයි – සමඟි ජන බලවේගය
ලොවපුරා උද්ගතව තිබෙන දැවැන්ත අර්බුදකාරී තත්ත්වය හමුවේ දස දහස් ගණනක් වූ මෙරට වැඩකරන ජනතාවගේ රැකියා සුරක්ෂිතභාවය පිළිබඳ බරපතල ව්යාකූල තත්ත්වයක් සහ ජීවත්වීමේ අරගලකාරී තත්ත්වයක් උද්ගතව ඇති බව සමඟි ජන බලවේගයේ නායක සජිත් ප්රේමදාස මහතා අවධාරණය කර සිටියි. මැයි දිනය වෙනුවෙන් සජිත් ප්රේමදාස මහතා විසින් මාධ්ය වෙත නිකුත් කර ඇති නිවේදනයක මේ බව සඳහන් කර තිබෙන අතර එහි තවදුරටත් පහත පරිදි කරුණු දක්වා තිබේ.
රට තුළ මෙන්ම ලොව තුළ ද ඇතිව තිබෙන මෙම ව්යසනකාරී තත්ත්වය හමුවේ ජීවත්වීමේ දැවැන්ත අරගලයකට ලක්ව සිටින රටේ වැඩකරන ජනතාවගේ ජිවිත සුරක්ෂිත කිරීම ආණ්ඩුවේ ප්රමුඛතම වගකීම වේ. එය ආණ්ඩුව විසින් පැහැර නොහැරිය යුතු කාර්යයකි. දේශපාලණිකරනයෙන් තොරව එම කටයුත්ත සිදුකරන්නැයි අප ආණ්ඩුවට බලකර සිටිමු. මෙම වසංගත තත්ත්වය හමුවේ රට ආර්ථික මෙන්ම රැකියාවන්ගෙන් ද දැවැන්ත අර්බුද රැසකට මුහුණදෙනු ඇත. ඒ අනුව වැඩකරන ජනතාව දැවැන්ත පීඩාවකට පත්ව සිටින මේ මොහොතේ මෙවර මැයි දිනය වඩාත් තීරණාත්මක බව පැවසිය යුතුය. එමෙන්ම කොරෝනා වෛරස් තත්ත්වය හමුවේ ඉන් රට මුදවාගැනීමට කටයුතු කරමින් සිටින පිරිස්වෙත අපගේ උත්තමාචාරය ද පුදකර සිටිමු.