විශ්වවිද්යාල අනධ්යයන සේවක ඉල්ලීම්වලට මෙතෙක් විසදුම් නෑ, අරගලය දැඩිවන ලකුණු..
සිය වෘත්තීය ඉල්ලීම් සම්බන්ධයෙන් විසදුම් ලබා දෙන ලෙස ඉල්ලා විශ්වවිද්යාල අනධ්යයන සේවකයින් විසින් දියත් කරන ලද වෘත්තීය අරගලය සම්බන්ධයෙන් බලධාරීන්ගේ කිසිදු අවධානයක් මේ දක්වා යොමුනොවීම නිසා ලබන 15 වැනිදා සිට සියළු අත්යාවශ්ය සේවාවන්ගෙන් ඉවත් වීමට තීරණය කළ බව විශ්වවිද්යාල වෘත්තීය සමිති ඒකාබද්ධ කමිටුව අවධාරණය කර සිටියි. මෙම තීරණයට අනුව විශ්වවිද්යාල තුළ සිදුවන ආරක්ෂක කටයුතු, ජලය හා විදුලිය සැපයීම ආදී අත්යවශ්ය සේවා රැසක් අඩාල වනු ඇති අතර මේ සම්බන්ධයෙන් වහාම අවධානය යොමු කර යම් විසදුමකට පැමිණීමට බලධාරීන් කටයුතු කළයුතුව ඇති බවද විශ්වවිද්යාල වෘත්තීය සමිති ඒකාබද්ධ කමිටුව වැඩිදුරටත් පවසා සිටියි.