ලැබූ නිදහස තවත් ශක්තිමත් කරනවා, නිදහස් දින ජාතික උත්සවය අමතමින් ජනාධිපති ගෝඨාභය රාජපක්ෂ මහතාගෙන් ප්‍රතිඥාවක්..
ලැබූ නිදහස තවත් ශක්තිමත් කිරීමට ප‍්‍රතිඥා දෙන බවත් ත‍්‍රස්තවාදයට මඟපාදන අන්තවාදී සංවිධානවලට තවදුරටත් රට තුළ ක‍්‍රියාත්මක වන්නට ඉඩ නොතබන බවත් ජනාධිපති ගෝඨාභය රාජපක්ෂ මහතා අවධාරණය කර සිටියි. අද (04) කොළඹ නිදහස් චතුරස්‍රයේදී පැවත්වෙන 72 වන නිදහස් දින ජාතික උත්සවය අමතමින් ජනාධිපති ගෝඨාභය රාජපක්ෂ මහතා මෙම අදහස් පළකළේය.
මෙහිදී වැඩිදුරටත් සිය අදහස් පළකරමින් ජනාධිපතිවරයා පහත පරිදි අදහස් පළකරන ලදී. රට තුළ උදාවී ඇති නිදහස තහවුරු කිරීමට කැපවූ සියළුම සිංහල, දෙමළ, මුස්ලිම්, මැලේ හා බර්ගර් නායකයන්ට මා ගෞරවය පුද කරනවා. සෑම පුරවැසියෙකුටම නිදහස්ව, සුරක්ෂිතව ජීවත් වීමේ අයිතියක් තිබෙනවා. ජනතාවගේ සිතීමේ අයිතිය, ස්වාධීන මතයක් දැරීමේ අයිතිය මෙන්ම අදහස් ප‍්‍රකාශ කිරීමේ අයිතියත් අප හැමවිටම තහවුරු කිරීමට කටයුතු කරනවා. එමෙන්ම ඕනෑම අයෙකුට කැමති ආගමක් ඇදහීමට ඇති අයිතියට අපි ගරු කරනවා.
